مراسم آغاز پروسۀ امتحان کانکور عمومی 1444 ولایت هرات

مراسم آغاز پروسۀ امتحان کانکور عمومی 1444 ولایت هرات امروز با حضور پوهندوی عبدالعزیز نعمانی رئیس پوهنتون هرات، مولوی منت‌الله آخندزاده نمایندۀ فوق‌العادۀ وزارت تحصیلات عالی و معاون مالی و اداری پوهنتون هرات، پوهندوی غلام حضرت حساس معاون امور محصلان پوهنتون، پوهنمل رحیم بخش فقیریار آمر امور استادان  وسرپرست معاونیت علمی پوهنتون، شیخ‌الحدیث مولوی محمد یوسف نمایندۀ شورای علمای ولایت هرات، پوهندوی عبدالرحمن عثمانی مسئول هیأت کانکور، رؤسای پوهنحی‌ها، استادان پوهنتون در سالون کنفرانس‌های مولاناجامی واقع پوهنحی شرعیات پوهنتون هرات برگزار شد.

مراسم با تلاوت آیاتی از کلام الهی آغاز شد و سپس پوهندوی عبدالعزیز نعمانی رئیس پوهنتون هرات ضمن خوش آمدگویی به مهمانان، پیرامون اهمیت فراگیری تعلیم و تربیه صحبت کرده و بر شفافیت کانکور تأکید کرد. وی از هیأت کانکور و همکاری استادان پوهنتون هرات قدردانی نمود.
در ادامه شیخ محمد یوسف نمایندۀ شورای علمای ولایت هرات برگزاری امتحان کانکور را امری مهم دانسته و درمورد اتفاق، وحدت، یکپارچگی و ارتباط نزدیک میان پوهنتون‌ها و مدارس دینی صحبت کرد.
سپس پوهندوی عبدالرحمن عثمانی رئیس هیأت کانکور به ارائه معلومات پیرامون کانکور پرداخته، گفت: در این امتحان به تعداد 6899 تن اشتراک دارند.
در پایان با حضور مهمانان و نمایندهای متقاضیان کانکور صندوق‌های حاوی سوالات باز و امتحان رسماً آغاز گردید.