د ترکیې د هېواد د سرقونسل د هرات پوهنتون له رئیس سره لیدنه
د ترکیې د هېواد سرقونسل په هرات کې، د هرات د بهرنیو اړیکو ریاست په همغږۍ، د پوهنتون له رئیس شیخ عبدالغني حقاني او د پوهنتون له مرستیالانو او استادانو سره لیدنه او خبرې وکړې.
په پیل کې، د هرات پوهنتون رئیس د ترکیې د هېواد سرقونسل ته ښه راغلاست ووایه او د دواړو هېوادونو تر منځ د تاریخي او ورورولۍ اړیکو یادونه یې وکړه. نوموړي څرګنده کړه چې افغانستان او ترکیه د تاریخ په اوږدو کې تل د یو بل ترڅنګ ولاړ دي. هغه د ترکیې د هېواد د پراخو همکاریو، په ځانګړي ډول د هرات پوهنتون په علمی برخه کې، مننه وکړه او د علمي او فرهنګي همکاریو د دوام ټینګار یې وکړ.
په دوام کې، د ترکیې د هېواد سرقونسل په هرات کې د پوهنتون له لیدنې خوښي څرګنده کړه او ویې ویل چې د ترکیې استازولۍ له پخوا څخه د هرات پوهنتون سره په علمي او فرهنګي برخو کې ګډې همکارۍ لرلې او اوس هم د دغو همکاریو د دوام او پراختیا لپاره چمتو دي.
نوموړي همدارنګه له هرات پوهنتون څخه وغوښتل، څو خپلې علمي او فرهنګي طرحې او وړاندیزونه (پروپوزلونه) وړاندې کړي، تر څو د دوه اړخیزو همکاریو په چوکاټ کې وڅېړل شي او ملاتړ ترې وشي.
