د هرات ولایت د ژورنالیزم پوهنځي او د انتاني شخصي روغتون ترمنځ د همکارۍ هوکړه لیک لاسلیک شو
د هرات پوهنتون رئیس، شیخ القرآن والحدیث مولوي عبدالغني حقاني، د ژورنالیزم پوهنځي رئیس پوهنيار ذبیح الله عرفان، او د انتاني شخصي روغتون رئیس ډاکټر عبدالناصر شهبازي په حضور کې، د هرات ولایت د ژورنالیزم پوهنځي او د انتاني شخصي روغتون ترمنځ د علمي او عملي همکاریو د ودې په موخه یو هوکړه لیک لاسلیک شو.
یاد هوکړه لیک د روغتیایي خدماتو د کیفیت ښه کولو او د عامه اړیکو دیپارتمنت محصلینو د عملي کارونو د ظرفیت لوړولو په هدف ترتیب شوی دی. د دې هوکړې له مخې، محصلین به د روغتون په علمي پروژو او ارتباطي فعالیتونو کې برخه اخلي، او همدارنګه استادان او د هغوی کورنۍ به د روغتیایي خدماتو په برخه کې له ځانګړو تخفیفونو څخه ګټه واخلي.
د دې هوکړه لیک موده درې کاله ده او د محصلینو لپاره د روزنیزو سیمینارونو تنظیم او د درملنې د کیفیت په اړه د سروې پروژو ترسره کول په کې شامل دي.
