د هرات پوهنتون ریاست د زراعت، اوبو لګولو او مالدارۍ ریاست سره د همکارۍ تفاهملیک لاسلیک کړ.
محفل د هرات پوهنتون ریاست د دفتر د مولوي نورالحق أزهر لخوا د قرانکریم د مبارکو آیتونو په تلاوت سره پیل شو.
وروسته د شیخ القرآن او الحدیث مولانا عبدالغني حقاني حفظه الله، چې د هرات پوهنتون رئیس دی، د امارتي ادارو ترمنځ د همکارۍ د تفاهملیکونو پر اهمیت ټینګار وکړ او وویل چې دا تفاهملیک به د علمي، تحصیلي او څېړنیزو همکاریو د پراختیا او د ګډو اهدافو لپاره د علمي اړیکو د پیاوړتیا په موخه لاسلیک شي.
الحاج آخندزاده ملا عبدالحی "منیر"، چې د زراعت، اوبو لګولو او مالدارۍ د هرات ریاست مشري کوي، د همکارۍ د دې تفاهملیک د لاسلیکولو په اړه خپله خوښي څرګنده کړه او ویې ویل چې دا تفاهملیک به د هرات د زراعت او مالدارۍ په وضعیت کې د ښهوالي سبب شي او د زراعت په برخه کې د ستونزو د حل لپاره به له علمي پوهې او تخنیکي تجربو څخه ګټه واخیستل شي.
