د هرات پوهنتون د دعوت او ارشاد آمریت له خوا د پوهنځیو له رئیسانو او استادانو سره غونډه ترسره شوه.
د هرات پوهنتون د دعوت او ارشاد آمریت یوه غونډه وکړه چې پکې د شیخ القرآن والحدیث مولانا عبدالغني حقاني حفظه الله د هرات پوهنتون رئیس، شیخ عزیزالرحمن مهاجر د هرات ولایت د امر بالمعروف او شکایتونو د اورېدنې رئیس، د پوهنتون مرستیالان، د پوهنځیو رئیسان او استادان ګډون وکړ. په دې غونډه کې د دعوت اهمیت، د هغې اغېزې په ټولنه کې د اصلاح لپاره او له قومي تعصب څخه د ډډې کولو په اړه خبرې وشوې.
په دې غونډه کې، شیخ عزیزالرحمن مهاجر د هرات ولایت د امر بالمعروف او شکایتونو د اورېدنې رئیس د دعوت او له تعصب څخه د ډډې کولو په اړه خبرې وکړې او ټینګار یې وکړ چې د ټولنې اصلاح د استادانو او علماوو په هڅو پورې تړلې ده. نوموړي زیاته کړه چې د پوهنتون استادان د هېواد اصلي ستنې دي او په دې برخه کې کلیدي رول لوبوي.
شیخ مهاجر وویل چې دعوت د هر مسلمان لپاره ديني وظیفه ده او زیاته یې کړه: «موږ باید د ستونزو په وړاندې صبر وکړو او د ټولنې د اصلاح لپاره خلکو ته قانع کوونکي دلایل وړاندې کړو.» هغه همدارنګه د دعوت په اغېزمنو لارو چارو خبرې وکړې او تعصب او قومپرستي یې د جاهلیت کړنې وبللې.
په دوام کې، د هرات د امر بالمعروف رئیس ټینګار وکړ چې د پوهنتون استادان باید د تعصبونو د له منځه وړلو لپاره هڅې وکړي او پوه شي چې دښمن د همدې لارې او فکري جګړو له لارې هڅه کوي چې د مسلمانانو تر منځ تفرقه رامنځته کړي. نوموړي غوښتنه وکړه چې استادان او علما دې د دښمن شوم پلانونه شنډولو لپاره دقیقې او اغېزمنې برنامې ولري.
