د هرات پوهنتون د چمن کاري، گل کاري او چاپېریال جوړونه
د هرات پوهنتون د مالي او اداري مرستیال له لوري د پوهنتون د چاپېریال د شينوالي، ښکلا او پاکوالي لپاره د خدماتي کارکوونکي د حضرت ابوبکر صدیق (رضي الله عنه)، حضرت معاویه (رضي الله عنه) او حضرت مصعب ابن عمیر (رضي الله عنه) په ټيمونو باندي وويشل سوه.
ددې پروگرام له مخي هر ټیم د پوهنتون دننه د چمن کاري، گل کاري، اوبه ورکولو او د پاکولو په څېر دندې به ترسره کوي.
د هرات پوهنتون د مالي او اداري مرستیال مولوي غلام رسول سروري په دې اړه خدماتي کارکوونکو ته وویل: "زموږ ددې پلان موخه د محصلانو او استادانو لپاره د یو ښکلي، پاک، شنه او مناسب چاپيريال او فضا برابرول دي، ترڅو د زده کړې کولو ترڅنګ د یو آرام او مناسب چاپېریال څخه هم برخمن سي."
نوموړي زياته کړه، چي دا ګام د پوهنتون د شنې فضا د ښه والي او پراختیا لپاره د نورو کارونو د پیل نمونه ده او په راتلونکي کي به د پوهنتون د چاپېریال د کیفیت د لوړولو لپاره ورته پروگرامونه پیل سي.
