د ټولنيزو علومو پوهنځي فرهنګي څانګې د جغرافیې، ټولنپوهنې او تاريخ څانګو په همغږۍ يوه رقابتي برنامه د « زرغون چاپيريال او پاکه راتلونکې» تر عنوان لاندې جوړه کړه.
په دې برنامه کې د جغرافيې څانګې د خلکو لپاره د چاپيريال ساتنې ککړتيا په وړاندې مقابله، د ټولنپوهنې څانګې کتاب ته پلمې مه لټوئ، د تاريخ څانګې د رسالت تاريخي سیر او د رسول اکرم ص سياسي ژوند تر سرليک لاندې رقابت وکړ.
دا مراسم د قران کريم په څو مبارکو ايتونو سره پيل شول. وروسته د ټولنيزو علومو د پوهنځي رئيس پوهنيار اسدالله اصيل، مېلمنو ته د ښه راغلاست تر څنګ د علم پر ارزښت خبرې او محصلين يې مطالعې او دا ډول برنامو جوړولو ته لا وهڅول.
وروسته د فرهنګي کمېټې مسؤول پوهنيار محمد ناصر محمدي د ټولنې او هېواد په وړاندې د محصلینو نقش ته ګوته ونيوه. هغه وويل چې دا ډول مسابقې کولای شي چې محصلين خلاق فکر ته وهڅوي، د نوښت روحيه په کې پیاوړې کړي.
د دې محفل په پای محصلينو ته تقدير نامې ورکړل شوې.
