د هرات پوهنتون د ښوونې او روزنې پوهنځي د استادانو عمومي غونډه.

د فاينل ازموينو په مناسبت د هرات پوهنتون د ښوونې او روزنې پوهنځي د استادانو عمومي غونډه د دې پوهنځي د رئیس پوهنوال بصير احمد کريمي تر رياست لاندې جوړه شوه، دا غونډه د ښوونې او روزنې پوهنځي د کنفرانسونو په سالون کې جوړه شوه. 
غونډه د قران کريم په څو مبارکو ايتونو سره پيل شوه، ورپسې د ازموينو د کمېټې مسؤول پوهنيار محمد طارق فیض د يادې کمېټې غړي همکارانو ته ور وپېژندل. دغه راز يې د ازموينو د ښو پيل کېدو په اړه هم خبرې وکړې او په دې برخه کې يې د استادانو لا توجه وغوښتله. 
وروسته د ښوونې او روزنې پوهنځي رئيس پوهنوال بصير احمد کريمي « له زده کړه ييزو موخو سره مطابق معياري ارزونه او ازموينه» تر سرليک لاندې ورکشاپ وړاندې کړ. 
دا ورکشاپ د دې پوهنځي د TTC کمېټې له خوا د باوري او باثباته ازموينو په خاطر په لاره اچول شوی ؤ، چې د استادانو د استفادې او تقدير وړ وګرځېد. 
د دې ورکشاپ په پای کې د پوهنوال کريمي له خوا د ګډونوالو پوښتنو ته ځوابونه وويل شول. 
دا غونډه د استادانو او کمېټې د غړو له تاوده هرکلي سره مخامخ شوه. او دا يې د استادانو د ظرفیت په لوړولو کې يو اغېزمن ګام وباله.