علمي سةینار «د خطر مدیریت؛ د بریالیو مدیرانو هنر» ترسره شو.
د هرات پوهنتون د عامه ادارې او عامه پالیسۍ پوهنځي له لوري یو علمي سمینار د «د خطر مدیریت؛ د بریالیو مدیرانو هنر» تر عنوان لاندې د دې پوهنځي د استاد پوهنیار حبیب الله عربزاده له خوا جوړ او ترسره شو.
په دې سمینار کې خطر د یوې داسې اغېزمن فکتور په توګه تعریف شو چې د سازماني موخو د تحقق پر کچې مستقیم اغېز لري، او بېلابېل ډولونه یې لکه مالي، عملیاتي او ستراتیژیک خطرونه وڅېړل شول. همدارنګه، د خطر مدیریت بهیر چې پکې د خطر پېژندنه، تحلیل، ارزونه، د مناسبو تدابیرو نیول او پرلهپسې څارنه شامله ده، په منظم ډول تشریح شو. د خطر پر وړاندې د ځواب ورکولو ستراتیژۍ لکه مخنیوی، کمول، انتقال او منل هم د بنسټیزو لارو په توګه وړاندې شوې.
وروسته د تصمیمنیونې د کیفیت په لوړولو، د ناوړه پایلو په کمولو او له فرصتونو څخه په ګټه اخیستنه کې د خطر مدیریت رول وڅېړل شو، او په بحراني حالاتو کې یې ارزښت لا زیات روښانه شو. په پای کې د خطر مدیریت د بریالیو مدیرانو له بنسټیزو مهارتونو څخه یو مهم مهارت وبلل شو.
